Շրջակա միջավայրի նախարարության «Բնապահպանական ծրագրերի իրականացման գրասենյակ» պետական հիմնարկի դոնորների հետ համագործակցության բաժնի գլխավոր մասնագետի պաշտոնակատար Լիա Ապիկյանը 2022 թվականի հունիսի 21-ից 23-ը մասնակցեց Հարմարվողականության հիմնադրամի և Fundecooperación para el Desarrollo Sostenible-ի համագործակցության արդյունքում Կոստա Ռիկայում կազմակերպված ընդլայնված ուղիղ հասանելիության վերաբերյալ եռօրյա միջազգային սեմինարին։
Կլիմայի հարմարվողականության ծրագրերի մշակումը և ֆինանսավորումը խրախուսելու նպատակով՝ սեմինարը հարթակ է տրամադրել երկրներին՝ քաղված դասերով, գիտելիքով և փորձառությամբ փոխանակվելու և կիսվելու համար: Սեմինարը նաև հնարավորություն է ընձեռնել ծանոթանալ ուղիղ հասանելիության շրջանակներում առկա վերջին թարմացումների, ուղիղ հասանելիության վերջերս հաստատված որոշ տարբերակների, մասնավորապես՝ նորարարության հետ: Սեմինարը նպատակ ուներ նաև նպաստելու զարգացող երկրների շրջանում Հիմնադրամի վերահավատարմագրման գործընթացի ըմբռնման խորացմանը և երկրորդ մարմնի հավատարմագրման հետ կապված ընդհանուր բացերի և խնդիրների քննարկմանը:
«Բնապահպանական ծրագրերի իրականացման գրասենյակ» պետական հիմնարկը՝ որպես ՄԱԿ-ի Հարմարվողականության հիմնադրամին հավատարմագրված ազգային մարմին, այն 27 ազգային մարմինների թվում էր, որոնք կիսվեցին ընդլայնված ուղիղ հասանելիության կիրառման, հարմարվողականության ծրագրերի մշակման և իրականացման իրենց փորձով:
