Ս.թ. հունիսի 22-23-ին «Բնապահպանական ծրագրերի իրականացման գրասենյակ» ՊՀ-ի էկոկրթական ծրագրերի իրականացման բաժնի պետի ժ/պ Ռ. Շահազիզյանը և դոնորների օժանդակությամբ իրականացվող ծրագրերի բաժնի պետի ժ/պ Է. Ոսկանյանը այցելեցին ՀՀ Տավուշի մարզի Դիլիջան (Աղավնավանք, Խաչարձան, Գոշ, Թեղուտ և Հաղարծին) և Լոռու մարզի Մարգահովիտ, Ֆիոլետովո համայնքներ:
Գործուղման նպատակն էր՝
- ՀՀ Տավուշի մարզի Դիլիջան համայնքի Աղավնավանք, Խաչարձան, Գոշ, Թեղուտ, Հաղարծին գյուղերի վարչական պատասխանատուների և Լոռու մարզի Մարգահովիտ, Ֆիոլետովո համայնքների համայնքապետերի, մասնագետների և բնակիչների հետ հանդիպումների կազմակերպումը:
- Գիտելիքների և տեղեկացվածության վերաբերյալ կարիքների գնահատումը:
- Շահագրգիռ կողմերին «Տեխնոլոգիական գործողությունների պլանի պատրաստում», «Կլիմայական Տեխնոլոգիաների և տարածման խոչընդոտների հաղթահարում» ուղեցույցների ներկայացում և տրամադրում:
Դիլիջանի քաղաքապետարանում հանդիպում կազմակերպվեց քաղաքապետի, քաղաքապետարանի մի շարք մասնագետների և «Էկոպոլիսի» բնապահպանական կենտրոն ՀԿ-ի հետ: Մասնակիցներին մանրամասն տեղեկատվություն ներկայացվեց «Հայաստանի բնության հատուկ պահպանվող տարածքներին հարակից համայնքներում հողատարածքների հարմարվողականության ներուժի բարձրացում» ծրագրի նպատակի, խնդիրների, առանձնահատկությունների և նախատեսվող այն միջոցառումների ցանկի վերաբերյալ, որոնք կարող են նպաստել բնական և գյուղատնտեսական էկոհամակարգերի հարմարվողականության բարձրացմանը, ինչպես նաև բնակիչների սոցիալական վիճակի բարելավմանը: Աղավնավանք, Խաչարձան, Գոշ, Թեղուտ, Հաղարծին գյուղերի վարչական պատասխանատուների և բնակիչների հետ կազմակերպված հանդիպումների ընթացքում քննարկվեցին ծրագրի հիմնադրույթները: Բնակիչների կողմից առանձնակիորեն կարևորվել են ոռոգման ջրի խնայողության, համայնքամերձ արոտների արտադրողականության բարձրացման, վարելահողերի բարելավման և էներգախնայողության աշխատանքները: Մարգահովիտ և Ֆիոլետովո համայնքներում ևս քննարկվեցին ծրագրով նախատեսված աշխատանքները՝ շեշտադրելով կլիմայի փոփոխության պայմաններում էկոհամակարգերի հարմարվողականության բարձրացման կարևորությունը: Բոլոր բնակավայրերում բնակիչների հետ քննարկվել են ընդհանուր օգտագործման (արևային ջրատաքացուցիչներ, չորանոցներ, ջերմատներ) կառույցների արդյունավետ օգտագործման կազմակերպչական խնդիրները: Ընդհանուր էր այն կարծիքը, որ նպատակահարմար է համայնքում ստեղծել համատեղ օգտագործողների խմբեր և դրանց միջոցով կառավարել այդ կառույցները: Մասնակիցների կողմից կարևորեցին նաև գիտելիքների բարձրացման աշխատանքները: Ցանկություն հայտնվեց, որ սեմինարների թեմատիկայում ընդգրկվեն այնպիսի նյութեր, որոնք կնպաստեն գյուղատնտեսության աշխատանքների վարման արդյունավետության բարձրացմանը, էկոզբոսաշրջության զարգացմանը, նոր մշակաբույսերի ներդրմանը, դեղաբույսերի վերամշակման հնարավորությունների բացահայտմանը: Նախօրոք մշակված հարցաթերթիկներով Դիլիջան քաղաքում, Աղավնավանք, Խաչարձան, Գոշ, Թեղուտ, Հաղարծին գյուղերում սկսվել են հարցումները՝ կարիքների բացահայտման նպատակով: Շահագրգիռ կողմերին ներկայացվել են «Տեխնոլոգիական գործողությունների պլանի պատրաստում», «Կլիմայական Տեխնոլոգիաների և տարածման խոչընդոտների հաղթահարում» ուղեցույցները: Նշվել է դրանց կարևորությունը դրամաշնորհային ծրագրային հայտերի մշակման գործընթացում: Դիլիջանի քաղաքապետարանին, Աղավնավանք, Խաչարձան, Գոշ, Թեղուտ, Հաղարծին գյուղերին և այլ ցանկացող անձանց տրամադրվել են ուղեցույցներ:
